مصر چین کو 145 ملین ماسک فراہم کرے گا

چین نے مصر سے 145 ملین طبی ماسک درآمد کرنے کے لیے ڈیمانڈ بھیج دی ہے۔ مصرکے ایوان صنعت و تجارت کے شعبہ ادویات کے نگران علی عوف نے مصری میڈیا کو بتایا کہ چین سے بڑی تعداد میں طبی ماسک کی ڈیمانڈ موصول ہوئی ہے۔علی عوف کا کہنا تھا کہ مصر میں تیار ہونے والے طبی ماسک بمشکل مقامی ضرورت کو پورا کرتے تھے تاہم چینی حکومت کی جانب سے انہیں موصول ہونے والی اشد ضرورت کو دیکھتے ہوئے ماسک تیار کرنے والی فیکٹریوں کو ہدایت کی ہے کہ وہ مصنوعات کی تیاری کے لیے اضافی عملہ اور وسائل استعمال کریں تاکہ ہنگامی حالت میں چین کی بڑھتی ہوئی طلب کو پورا کیا جاسکے۔واضح رہے چین میں کرونا نے انتہائی خطرناک صورت حال اختیار کر لی ہے۔ اس وائرس سے اب تک ہلاکتوں کی تعداد 5 سو سے زیادہ ہو چکی ہے جبکہ متاثرین کی تعداد ہزاروں تک پہنچ چکی ہے۔