چین: کرونا وائرس سے ہلاکتوں میں اضافہ، متاثرہ مریضوں کی شرح میں کمی

ویب ڈیسک — 

چین میں کرونا وائرس سے متاثرہ مزید 108 افراد کی ہلاکت کے بعد اس وائرس سے ہلاکتوں کی مجموعی تعداد ایک ہزار 16 تک پہنچ چکی ہے۔

چین کے نیشنل ہیلتھ کمیشن کا کہنا ہے کہ منگل کو کرونا وائرس سے ہلاک ہونے والوں کی تعداد ایک روز کے دوران اب تک کی سب سے بڑی تعداد ہے۔

حکام کا کہنا ہے کہ کرونا وائرس سے ہلاکتوں کی یومیہ شرح بڑھ رہی ہے تاہم اس وائرس سے متاثرہ مریضوں کی یومیہ تعداد میں کمی واقع ہو رہی ہے۔

حکام کا کہنا ہے کہ 10 فروری کو کرونا وائرس کے مزید 2478 نئے کیسز سامنے آئے ہیں۔ تاہم اتوار کو نئے کیسز کی تعداد 3062 تھی۔ اس وائرس سے متاثرہ مریضوں کی مجموعی تعداد 42638 ہو چکی ہے۔

دوسری جانب امریکہ کی ریاست کیلی فورنیا میں کرونا وائرس کا ایک اور کیس سامنے آیا ہے جس کے بعد امریکہ میں اس وائرس سے متاثرہ مریضوں کی تعداد 13 ہو گئی ہے۔

امریکہ کے سینٹر فار ڈیزیز کنٹرول (سی ڈی سی) کا پیر کو جاری اپنے ایک بیان میں کہنا تھا کہ کیلی فورنیا کے جس شخص میں کرونا وائرس کی تصدیق ہوئی ہے اسے حال ہی میں چین کے شہر ووہان سے امریکہ منتقل کیا تھا۔