جنوبی کوریا، ایران اور اٹلی میں بھی کرونا وائرس سے ہلاکتوں میں اضافہ

ویب ڈیسک — 

چین کے شہر ووہان سے پھیلنے والے کرونا وائرس نے جنوبی کوریا کو بھی اپنی لپیٹ میں لے لیا ہے۔ اتوار کو جنوبی کوریا میں وائرس سے مزید 2 افراد ہلاک ہوگئے جس کے بعد مرنے والوں کی مجموعی تعداد 4 ہوگئی ہے۔

اتوار کو 123 نئے کیسز بھی رپورٹ ہوئے جس سے کیسز کی مجموعی تعداد 556 ہوگئی ہے۔

چین میں اتوار کو مزید 97 افراد مارے گئے جس سے مرنے والوں کی مجموعی تعداد 2442 ہوگئی ہے۔ علاوہ ازیں اتوار کو 648 نئے کیسز بھی رپورٹ ہوئے۔

اے ایف پی کی رپورٹ کے مطابق ایران اور اٹلی میں بھی کرونا وائرس سے مرنے والوں کی تعداد میں اضافہ نوٹ کیا گیا ہے جس کے بعد وہاں حفاظتی انتظامات انتہائی سخت کردیئے گئے ہیں۔