ترکی میں استنبول کے ایک ہوائی اڈے پر ایک مسافر بردار طیارے کے رن وے سے پھسل جانے سے تین ٹکڑے ہو گئے۔
حکام کے مطابق اس واقعے میں کم از کم 120 افراد زخمی ہوئے ہیں۔
حکام کے مطابق پیگاسس ایئر لائن کی ایک پرواز پر 171 مسافر اور عملے کے چھ ارکان سوار تھے۔ طیارہ ملک کے مغربی صوبے ازمیر سے استنبول پہنچا تھا جہاں یہ صبیحہ گوکن کے ہوائی اڈے پر حادثے کا شکار ہو گیا۔
ترکی کے مواصلات کے وزیر محمد چاہت تورہان نے کہا ہے بوئنگ 737 خراب لینڈنگ کے بعد اپنی رفتار پر قابو نہیں رکھ سکا تھا۔
اس واقعے کے بعد ہوائی اڈے کو عارضی طور پر بند کر دیا گیا اور تمام پروازوں کو دوسرے ہوائی اڈوں کی طرف موڑ دیا گیا ہے۔
ترکی کے ذرائع ابلاغ کے مطابق تیز بارش اور طیارے کے عقب پر ہوا کے تیز دباؤ کی وجہ سے یہ حادثہ پیش آیا۔
طیارے کے حادثے کی ویڈیوز میں دیکھا جا سکتا ہے کہ ٹوٹے ہوئے طیارے سے مسافر نکلنے کی کوشش کر رہے ہیں جبکہ بہت سے امدادی کارکن اس کے اردگرد کام کر رہے ہیں۔ کچھ ویڈیوز میں جہاز کے اندر لگی آگ بھی دیکھی جا سکتی ہے لیکن اس آگ پر بہت جلد قابو پالیا گیا۔
ترکی کے ذرائع ابلاغ کا کہنا ہے کہ اس جہاز کے دو پائلٹس جن میں سے ایک کا تعلق ترکی اور دوسرے کا تعلق جنوبی کوریا سے تھا زخمی ہیں۔
ترکی کے وزیر مواصلات کا کہنا ہے کہ ابھی تک حکام کو جہاز کے پائلٹس سے بات کرنے کا موقع نہیں ملا ہے۔
کوئی تبصرے نہیں:
ایک تبصرہ شائع کریں
Please do Not enter your any spam link in the comment box.