حکومتی پیکج عوام کا معاشی قتل قرار

لاہور:(12 فروری 2020)ترجمان پاکستان مسلم لیگ (ن) مریم اورنگزیب نے حکومتی پیکج کو عوام کا معاشی قتل قرار دے دیا ہے۔

تفصیلات کے مطابق میڈیا سے گفتگو کرتے ہوئے مریم اورنگزیب نے کہا کہ عمران مافیا کا پندرہ ارب کا پیکج عوام سے محض دھوکہ اور غریبوں کا مزید معاشی قتل عام ہے، چور اور کرپٹ عمران مافیا کی وجہ سے عوام ، ملک اور معیشت کو ناقابل تلافی نقصان پہنچ رہا ہے لیکن مسئلہ اب چورعمران مافیا کی حکومت کا نہیں، بلکہ پاکستان کا ہے، ملکی معیشت، سیکیورٹی،سلامتی اور سالمیت کا ہے۔

مریم اورنگزیب نے کہا کہ عمران مافیا نے ہر شعبے میں چوری اور کرپشن عام کردی،اٹھارہ ماہ میں تیرہ ہزار ارب کا تاریخی قرض لیا لیکن ایک نئی اینٹ نہیں لگائی، روپے کی قدر پینتیس فیصد گرائی، ایکسپورٹ پھر بھی گررہی ہیں، گیس تین سو فیصد اور بجلی ڈھائی سو فیصد مہنگی کردی، دوائیاں پچاس فیصد مہنگی کر دیں، ترقی کے شرح 5.8 سے 1.9 فیصد کر دی، اور مہنگائی تین فیصد سے پندرہ فیصد کردی، یہ سب کرپشن اور ڈکیتی نہیں ہے تو اور کیا ہے۔

ترجمان (ن) لیگ کا کہنا تھا کہ عمران مافیا کا پندرہ ارب کا پیکج جہانگیر ترین اور خسرو بختیار کے لئے ریلف پیکج اور عوام کے کئے تکلیف پیکج ہے۔