معاون خصوصی کے اپوزیشن پر کرارے وار

اسلام آباد:(12 فروری 2020)معاون خصوصی برائے اطلاعات و نشریات ڈاکٹر فردوس عاشق اعوان کا کہنا ہے کہ پاکستان کے عوام کا خون چوس کرغریبوں کے پیسے پر پلنے والے آج حکومت میں کفیل ڈھونڈ رہے ہیں۔

تفصیلات کے مطابق سماجی رابطے کی ویب سائٹ ٹوئٹر پر جاری اپنے پیغام میں پارلیمنٹ ہاؤس کے باہرحزب اختلاف جماعتوں کا احتجاج ان کی سیاسی محرومیوں کے ماتم کے سوا کچھ نہیں ہے اور حزب اختلاف کی جماعتیں عوام کے لیے نہیں بلکہ اپنے سیاسی مفادات کے لیے احتجاج کر رہی ہیں،ان کے پیٹ میں عوام کی ہمدردی کا نہیں بلکہ اپنی بدعنوانی اور اقتدار کا درد ہو رہا ہے۔

معاون خصوصی نے کہا کہ ‏احتجاج کرنے والے عوام کے وہ مجرم ہیں جنہوں نے اس قوم کو غربت، قرض اور مہنگائی کی دلدل میں دھکیلا، یہ ان لوگوں کے نمائندے ہیں جنہوں نے پاکستان کے ہوائی اڈے تک عالمی اداروں میں گروی رکھے۔

فردوس عاشق اعوان کا کہنا تھا کہ پاکستان کے عوام کا خون چوس کرغریبوں کے پیسے پر پلنے والے آج حکومت میں کفیل ڈھونڈ رہے ہیں،مافیا کے سرغنہ لندن میں ہیں،خواجہ آصف صاحب کو چاہیے وہاں رابطہ کریں۔

انہوں نے حزب اختلاف پر کڑی تنقید کرتے ہوئے کہا کہ ‏یہ ان لوگوں کااحتجاج تھا جو عوام کے خرچے پر اب بھی مزے اڑا رہے ہیں، اقتدار میں رہ کرانہوں نے قوم سے اس کی زندگی اور مستقبل چھین لیا۔

بلاول بھٹو کو مخاطب کرتے ہوئے ڈاکٹر فردوس عاشق اعوان نے کہا کہ بلاول صاحب یہ آپ کے دور کی کرپشن ہے جس کا خمیازہ قوم بھگت رہی ہے، ابو اور پھوپھو سے کہیں کہ قوم کا لوٹا ہوا پیسہ واپس کر دیں، مہنگائی ختم ہو جائے گی۔